【闲话闲画】吃面还吃红汤面

　　文图/阿仁

　　上海人欢喜吃面。有交关朋友是“天天见面”个。老里八早个辰光，大饭店、小摊头都有阳春面供应。阳春面名字好听，其实就是光面。不过伊个辰光喊一碗阳春面上来是勿见得坍台个。更有老吃客还会关照堂倌：“重油、宽汤、重香头！”重油，猪油多放一点。宽汤，汤水也要满一点。重香头，几粒葱花勿够，要撒上一大把才过瘾头。一碗阳春面就是一顿早饭，也可以是下半天个一顿点心。

　　上海人最欢喜吃个是苏式红汤面。苏州面馆出名个是沧浪亭。最早个沧浪亭辣重庆南路，靠近淮海路。坐东、朝西，只有一开间门面。临马路一边还开了窗口卖苏式糕点：赤头糕、绿豆糕、黄松糕、方糕、条头糕。店堂里挂着姑苏有名个书画家吴湖帆先生题写个店名：“沧浪亭”。现在上海马路浪看到个沧浪亭分店个横匾浪个三个大字“沧浪亭”就是从此地来个。勿晓得几经沧桑吴湖帆个真迹还辣海。搿帧墨宝今朝至少也值个百把万了。我看，沧浪亭最叫好个面点是腰花面、鳝糊面脱葱油肉丝面了。“困难时期”个年代，沧浪亭一碗好个浇头面要卖5、6块洋钿。要晓得当时上海青工个月工资也就只有30块上下。就是搿能，到沧浪亭去吃碗面个顾客还得天勿亮就去排队。伊个辰光我才十多岁，跟了爷娘到沧浪亭去排队等天亮，只为吃一碗热汤热水个葱油面。

　　修造南北高架，搿一带开拓马路，沧浪亭搬场了，到巨鹿路个几间外间朝北门面去做生意了。又后来为了让楼上个居民清静，沧浪亭又搬回老重庆路靠淮海路伊面。搿一家是上海滩浪正宗个沧浪亭。其余各区、各条马路浪个都是老沧浪亭拷贝出来个，用现在个讲法，连锁店是也。因为一直追随老沧浪亭，与老店里个老职工都熟了。厨房间里个夏师傅是十几岁就顶替伊拉阿爸到店里来下面、炒浇头了。到年底年初，老夏也要退休了。跟牢追击一爿面店一直吃到大厨师告老还乡，我吃面个劲头可见一斑哉。

　　早几年上海又开出一爿“吴越人家”个红汤面店。因为味道也入味，生意火爆。此后也生出不少连锁店。近来“吴越人家”好像也有点沉沉浮浮，足见辣上海滩浪要拜一记面大王，竞争是够结棍个。搿两三年里还有勿少以苏州人、上海人长辈称谓为店名个红汤面馆开了出来。“好婆”面店、“外婆”面店、“阿爷”面店、“爷叔”面店……生意做得好个，店门口也排起长队。沧浪亭个老夏师傅是退休了，但交交关关个小夏师傅辣拉成长。苏州红汤面，赞！