【沪语编讲】牛顿也炒股票

　　文/吴兴人

　　迭个牛顿先生，就是大名鼎鼎的发现万有引力的科学家牛顿。中学生辣物理教科书浪统统认得伊。1705年伊被封为爵士，1727年3月20日去世。当时伊个墓碑浪刻着迭样几句话：“让人类欢呼这样一位如此伟大的人曾经荣耀地存在于世界”。但是，交关人勿晓得，牛顿辣晚年也炒过股票，迭能一位大科学家辣股市里翻了一个大跟斗。

　　早辣两百多年前，英国个股市就老闹猛。牛顿勿满足辣科研方面个成就，伊想凭自家搿只天才个脑袋，辣炒股浪“搏一记”，稍微动点小脑筋，轧轧苗头，买进抛出，稳发大财。

　　牛顿勿是搿种关起门来只搞科研个科学家，伊还做过英格兰皇家造币厂个厂长，不过，再多钞票牛顿一张也勿敢捞到自家口袋。伊袋袋里个钞票真个勿多，年薪仅2000英镑。牛顿觉着自家既做厂长，又做科研，口袋里只有迭点钞票，实在勿公平。伊看见别人炒股发了大财，眼睛有点红。伊想，搿点小市民炒股票赚到了交关钞票，我个脑子好好叫比伊拉灵光，为啥勿能拿存款翻几番？

　　牛顿跳进股市，碰到了一个牛市，开始尝到甜头。当时有只叫英国南海公司个股票，有英国政府个背景，交关人侪抢了买。迭只股票个价钿，从1720年1月每股128英镑直线上升，涨幅惊人。4月，牛顿拿出了自家7000英镑个积蓄，毫勿犹豫个买进迭只股票。果然，买进就暴涨，只过两个月，7000英镑变成14000英镑。牛顿赶快抛脱，一转手，赚了7000。看看每日股市行情个步步摸高，比印钞机印钞票还快，牛顿个心也要跳出来了。

　　但是，刚刚抛脱股票，牛顿就懊恅了。迭只股票到了7月，每股涨到1000英镑，几乎是买进价钿个8倍。只怪自家沉勿牢气，抛得太早，否则好赚更多。但是，伊犯了多数股民个老毛病：赚了还想赚更加多。牛顿决定再“搏一记”，加大投入，仍旧买迭只股票。不过，股市实在是变幻莫测，再精明个牛顿也勿能算计出迭只股票个未来。伊万万呒没想到，迭家公司碰到了经营困境，股票个真实价格和市场价格严重脱钩，里向侪是泡沫。牛顿更呒没想到个是，一个月前英国政府通过了一部《反泡沫公司法》。牛顿倒霉了，以1000英镑一股买进个股票，直线下跌，大幅跳水，一直跌倒124英镑，股民血本侪蚀得精光。牛顿想再摒一摒，过了几天，又从124英镑跌倒110英镑，乃末吓煞了，快点全部抛脱，除开头赚到个7000英镑全部输光，还净亏20000，等于伊当厂长十年个年薪。

　　牛顿懊恅煞了，伊讲：“我能算出天体运行个轨迹，就是估计勿出股市个大起大落。”从此牛顿再也勿炒股票了。