天平家园鹤翔航头朱家角古镇泗泾 今日九星宝山社区璀璨徐家汇定海家园科瑞物业湖南社区健康枫林今日虹梅今日练塘龙华社区曲阳社区庙行之声北站社区江桥报太平家园嘉兴天地美丽顾村和谐盈浦金泽报道康健社区走进广中
关闭
新民网移动客户端点击或扫描下载
您现在的位置:首页 > 上海闲话 > 头条 > 正文

【闲话闲画】棉毛衫、绒线衫、老棉袄

2014-01-14 14:57
来源:新民晚报        新民网编辑:田诗雍    作者:阿仁T | T 字号: 打印 参与评论(0)

  文图/阿仁

  上海个天气四季分明。3月、4月、5月春天,6月、7月、8月热天,9月、10月、11月秋天,12月、1月、2月冷天。每个季节3个月,大家勿吃亏。

  现在勿一样了,热天与冷天大出来了,春天与秋天缩脱了。呒没太长个辰光可以来穿春装跟秋装了。买衣裳个重头戏变成了去买夏装和冬装。欢喜打扮、欢喜翻翻行头个小姑娘告老阿姨对搿样个体会肯定更加深刻个。

  天冷了,老早个上海人贴身穿绒布衫、绒布裤。后来更加方便与暖热个是套棉毛衫跟棉毛裤了。上海人把厚一点个针织棉纺内衣叫做棉毛衫。三枪牌是棉毛衫裤个上海名牌。伊出名辣当时放日本电视剧《姿三四郎》个辰光。“乓乓乓,三枪牌内衣!”搿也是电视里做广告个先行者。棉毛衫外面要穿衬衫。既要体面又要节约个上海人就行出了节约领。节约领为了省点衣料,只有一只登样个衬衫领头,像一件半截子个小马甲套辣肩胛上,告咾上海人还叫伊为假领头。假领头只要面子、勿要夹里,当时穿了假领头还是要拨大家叉叉个。衬衫外面穿绒线衫了。绒线衫就是北方人讲个羊毛衣了。上海个女同志都会自家来打毛衣——结绒线。一点勿会结绒线个阿姨妈妈辣伊个年代会拨人家背后讲两句:“我看伊勿是笨而是懒!连结件绒线衫、绒线背心都勿会,伊拉先生呒没福气……”怕冷个上海人有辰光还会套两件、三件绒线衫。加上下身还穿绒线裤、绒线袜,可以讲一个人身浪背了半爿绒线店了。真正个冷天里,上海人还会穿上棉袄、披上大衣。旧了一点棉袄,辣上海闲话里叫老棉袄。有点家当个人家用丝棉来做棉袄,衣裳个面布也用绸子来做,来显示自家个身价。农历新年,是弄堂里小囡穿新棉袄个最佳辰光。假使能够从里面新到外面,从头顶新到脚底,那就是有铜钿人家个宝宝子、肉肉子哉。

  从棉毛衫、衬衫、绒线衫、老棉袄算到派克大衣,老早个上海人要穿五六套衣裳来过冬。重煞了。因此羽绒服个面世就解放了大家。羽绒服拨上海人叫作滑雪衫。滑雪衫勿但轻还穿了暖热,式样款式也要比老棉袄花头多。从此以后上海人过冬就瘦身了:一件内衣、一件套衫、一件滑雪衫,简单方便多了。“老三套”棉毛衫、绒线衫、老棉袄开始退出历史舞台。做人家个上海人还舍勿得扔掉搿点宝贝,还拿伊晒晒太阳、压压箱底。我九十多岁个老姆妈就翻出一条我半岁辰光穿过个开裆小棉裤,老布面子、绒夹里,还簇新簇新个。我拿伊当古董当心收藏了。毕竟阿拉大家侪是穿仔搿样个行头来走上人生道路个。

侬好上海由新民网出品
微信号:helloshanghai2013
大城小事,第一辰光微信阿拉
扫一扫,关注有惊喜!
小侬等你来报道!

(新民网编辑:田诗雍)
今日热点

发布评论

评分:
 /  人已评
>>已有条评论

您还能输入140

查看网站地图

增值电信业务经营许可证(ICP):沪B2-20110022号 | 互联网新闻信息服务许可证:3112009001 | 信息网络传播视听节目许可证:0909381

广播电视节目制作经营许可证:(沪)字第536号 | 新民晚报官方网站 xinmin.cn ©2013  All rights reserved.

您还未登录
用户名:
密    码:
下次自动登录    找回密码
没有账号?    立即注册
新民网友:
评论成功

评论成功,谢谢参与!

点“看微博”查看您的上海滩微博

   

评论成功

评论成功,谢谢参与!