【闲话闲画】暖锅、电热锅、电磁炉

　　文图/阿仁

　　冷天一到，老底仔个上海人就要从灶披间里寻出暖锅来。上海人所讲个暖锅，就是京式个紫铜火锅。一只做工考究一点个暖锅辣老上海要卖老价钿个。屋里向能够搬出一只紫铜做个暖锅来请客，主人家就显得派头十足。生旺一只暖锅是有点技术含量个。木炭到煤球店去买质量最好个。勿但火头旺还经得起烧个木炭，上海人叫伊为钢炭。要烧红木炭个偷懒办法是拿伊放到煤球炉里去烘一歇。炭条红了，放进暖锅正中央个锅膛，还可以套上一只长个铅皮烟囱来拔拔火头。吃暖锅就是吃大杂烩，荤个、素个、生个、熟个都可以放到锅子里去煮一通。锅底可以铺上一层白菜帮子，咸肉、鲜肉、鱼丸、肉丸、河虾、肉皮、冬笋、笋干、油豆腐、开洋、鱿鱼……侬想吃啥就放啥进去。切成薄片个,要显示刀功个。摆出条理个，是展示花式。盖上锅盖，等汤水滚了开了，就可以敠【dak】到台子当中去了。冷天里吃暖锅，图个就是热汤热水、火热涾【dhok】涾滚。道地一点个，每样小菜都有备份。吃光了再加，加满了再吃。钢炭烧得力道勿够了，拿锅子再端到天井里去加炭加汤加水。最后，大家吃得快要投降了，就可以加进泡好个线粉，烫进汏清爽个菠菜，每人来一碗三鲜粉丝汤。味道好极了，鲜得侬眉毛也落下来哉！

　　大家欢喜个暖锅辣“十年动乱”里被打成了“四旧”。紫铜锅子被踏踏瘪，卖到废品回收站去了。现在啥人家还能够端出一只暖锅来，可以当伊为古董了。后来顶替暖锅个是电热锅。电热锅其实就是一只电热丝炉上面加了一只钢宗锅子。一插电，电热丝就烧开了一锅子个水，效果等同暖锅。不过，搿气氛与情调是随便哪能比不过紫铜锅子个。何况，暖锅还有一根窜出火苗、火星个烟囱管，就是看也看得侬热烔烔了。现在进入上海人千家万户个是电磁炉。电磁炉要比电热锅安全千百倍。

　　温度还可以随意调节，要烧开要保温随侬高兴。扁扁平平个电磁炉还勿占一点地方，用过了朝碗橱里一塞就可以了。暖锅——京式火锅还有看得见个地方，云南路、宁海东路一带有交关热气羊肉个火锅店，伊拉用个锅子就是京式铜质火锅。一排生摆辣店门口烧得通通亮，是小吃街浪个一道火热风景线。

　　日脚过得最推扳个辰光，我还用过“热得快”来假冒过暖锅。两根、甚至三根大号“热得快”浸到钢宗锅子里来加热汤水。吃相是难看个，效果还可以。台子浪要拖出好几根电线下来，危险得吓人。伊个当口，为了解馋，死人勿管了。