【闲话闲画】木、木兄兄、木知木觉

　　文/阿仁

　　搭几个朋友约好去龙华寺碰头。相信菩萨个可以去烧烧香。吃得清淡个可以辣海庙里个素斋用一碗罗汉面。贴隔壁个烈士陵园里可以散散步、踏踏青、拍拍照。碰头地点约定辣庙门口。好几个人都迟到了。伊拉还是老皇历，只晓得坐公共汽车才能够摸到龙华寺。其实11号地铁就到龙华寺。从地铁口出来，迎面就是龙华宝塔树辣眼门前。勿足百步就可以走到庙门口了。迟到个朋友都叹气：“唉，木了木了！新上海叫阿拉迭点老上海也变成了阿木林哉！”上海闲话里个木，有两层意思。

　　一、动作迟钝，反应缓慢，做事办事手脚勿利索勿快捷。二、脑子勿灵活，思路勿敏捷。前者个木，多半是形容上了年纪个人。“老娘舅坐下来攀谈攀谈、讲讲闲话还看勿出七十多岁了。但是一走路一上台阶就显得木了。年纪不饶人啊。”还可以用木来描写做事勿爽气个朋友。“叫小张去搬几只凳子来，完结！伊就是木兄兄个人，急勿出来个！”后者个木，是形态思路僵化、脑子死板个朋友。“侬假使照我个路子来配牌，侬就老早赢了。侬迭记木脱了！”“先揩台子后扫地，台上地下全部干净。侬反过来做，地板又龌龊了。真是木噱噱！”岁数大了，老了，木了，大家体谅。年纪轻轻个，勿肯多动脑筋，做事体木兴兴、木兄兄、木噱噱，拨大家当笑话来讲，作孽。

　　普通话里个木，刻画一个人感觉一时丧失，木然是也。称反应勿够敏捷个，木头木脑是也。上海人讲起来，搿就是木知木觉。木知木觉，上海闲话也有讲成为木知木角个。“单位里已经调来了新个领导，侬还勿晓得勿认得，真是太木知木觉了，算侬狠！”“小菜场摊头浪有几个人靠过来问价钿，伊拉一定是连裆模子，拿我个皮夹子冲脱了。我一点勿觉着，木知木觉，倒霉煞脱了。”

　　与木搭介个绰号里，拨上海人讲得最多个就是阿木林了。阿木林，里面有三个木，可以讲是木到根了。不过老上海称之为个阿木林，是指有点乡愚、对时新类事物勿识勿懂个人。阿木林还算勿得是骂人个闲话。上海人还常常用伊来自嘲一番。“迭只新手机功能实在太多了，我一点也白相勿来。儿子教了我好几趟还是勿来三。我真是个阿木林！”阿木林可以算是老个上海闲话了。年纪小个上海人已经勿用了。伊拉用啥，考察中。