【闲话闲画】呆徒、呆笃笃、呆剥落厾

　　文图/阿仁

　　小马路浪车子乱停乱放，路当中变成了羊肠小道。一部装满货色个黄鱼车与一部电动车碰头了，大家过勿去。踏黄鱼车个是一个成色相当新个新上海人，年纪勿大。因为货色多、车子重，伊就一动勿动。开电动车个是一位上海老阿姨。急了，老阿姨喊得老响个：“喂，侬朝旁边笼头别一别、借一借，我过去了侬也好过来哉!”踏黄鱼车个因为听勿懂一连串个上海闲话，有点呆顿顿。老阿姨蛮活络个，退了几步就从上街沿开过去了。回头还对黄鱼车白白眼睛：“今朝触霉头，大清老早就碰到一只呆徒!”踏黄鱼车个来气了，拉牢我问我：“大叔，那个女人骂我什么了？再要撞上她非得给她点颜色瞧瞧!”我打圆场：“她没骂你，算了。”“她好像说我是‘眼大’，啥叫‘眼大’？”我顺水推舟：“她说‘眼大’就是大家眼睛睁大点。这不，彼此就方便通过了……”捣了一记浆糊，免得日后生事。黄鱼车消了气，也就过了。

　　上海闲话里个呆徒算勿上是太伤人个骂人闲话。呆徒与普通话里个呆子是有点差别个。呆子，傻，笨。呆头呆脑，傻瓜笨蛋是也。而呆徒，上海人多半是指别人个脑子勿够灵活、动作勿够灵敏。碰到事体反应太慢，做起事体笨手笨脚。“小外孙一脚踏空了，侬也勿晓得窜上去接一把，侬只呆徒!”搿是讲人家动作迟钝。“拿绳子辣竹竿浪多绕个几圈再打只结，勿是就吊得杀杀牢啦!呆徒!”搿是指别人勿多动脑筋。想勿出好个法子。要形容起呆徒，上海闲话里有一连串好讲：呆顿顿、呆笃笃、呆勃勃。要一言以蔽之，葛就是呆剥落厾。交交关关上海闲话平常是常常掛辣嘴边浪个。但要侬能够辣纸面浪写出来，葛就勿是一桩便当个事体了。假使能够千辛万苦个写出来了，要别个上海人能够一眼看得懂，弄得清爽，那就更是吃力个生活了。呆剥落厾就是其中之一，好讲，难写。省力省心个办法有，葛就是去买一本《上海话大词典》来翻翻查查。搿能介，侬个上海闲话水平就勿再是口头浪个，连笔下也可以去做上海闲话个托福老师哉。新个上海人要听得懂上海闲话，讲得来上海闲话。搿样辣上海滩浪来打工、来生活、来过日脚就顺当多了。勿然，拨上海人个上海闲话蒙了头就太尴尬了。电动车欺侮黄鱼车个故事也就勿会常常发生了。