【闲话闲画】额角头碰到天花板

　　文/阿仁

　　上海人把额头叫做额角头。小辰光，额角头上是大热天里生热疖头个好地方。只要弄堂里有小朋友辣额角头上贴起了一片黑药膏，就可以晓得伊辣一个热天里勿太平哉。伊个额骨头就变成了禁区，碰勿得，摸勿得了。老起来，额角头是年纪个刻度表，上面会出现与眉目平行个长短皱纹。上海人因为搿样个皱纹与马路浪个有轨电车轨道一样平行延伸，就叫伊为电车路。“额角头上开出交关电车路了，老了老了！”生动幽默。一个人假使诸事顺当，气色好，身体好，上海人就会恭维道：“喔哟，侬额角头亮堂堂，一定发财了！”而碰到个朋友是诸事不利、气色推扳、身体虚弱个，别人会辣背后议论、点点戳戳：“伊近来一直交蘑菇运，额角头暗得像只臭皮蛋的颜色，看来霉头触足了。”

　　额角头被老上海人看作时来运转个晴雨表，由此凡有人碰到了好运道，大家就会连连叫好：“侬额角头高！侬额角头真高！”比如去买彩票来试试运气，上海闲话讲作“碰碰额角头”。真个幸运儿一旦中了大奖，就会被形容为额角头碰到天花板了。一个人个骷郎头能够一记头撞到天花板上，那么搿位朋友肯定是端坐辣屋里向了。

　　人辣家中，洪福临头，足见好运道是躲也躲不开个。上海闲话里个巧妙之处由此也可以见到一斑。就算碰到灾难危险，能够逃过一劫，全身而退个，上海人还是用“额骨头碰到天花板”来比喻个。“一部十轮卡撞到我乘个公交车，我前排个告后排个几个人都受伤了，我一点呒啥啥，就是吓了一大跳，侬看，我个运道好伐？额角头碰到天花板哉！”

　　普通话常用“怒发冲冠”来形容人个怒火中烧。上海闲话还是会用额角头来做文章，“额角头上冒鬼火”即是。上海人发怒、发脾气称之为发火。连额角头上也青烟缕缕、火光闪闪，可见迭个火气之大、火气之呒没由头。额角头鬼火冒显然是有相当贬意个。与额角头碰到天花板相反个，就是额角头碰到棺材板了。活端端个好人骷郎头撞上棺材板，运气差极、极差运气。搿当然已经是老早老早个老上海闲话了。蛮有噱头个是，要有运道好极个比拟能够超越额角头碰到天花板个，上海人会讲：“死人额角头！”这句话用辣自身，是有点自嘲个。用辣别人身上，则是有点嘲嘲人家个。关于额角头个闲话，还真有讲头个。