【闲话闲画】霉头触到印度洋

　　文图/阿仁

　　上海闲话把交上好运道叫做额角头，把运道推扳叫做了触霉头。触霉头是从普通话里个倒霉引申过来个。老里八早就有文人来考证过倒霉个由来了，说是倒霉是从“倒煤”演变出来个。而“倒煤”又出自于“倒灶”。一家之中炉灶是每一天生计个必需，烧饭煮粥燉水少勿了灶头。把灶头推倒拆散，吃喝就成了天大问题。倒灶，无饭可吃了，搿要比现在讲“敲脱侬个饭碗头”更加辣手结棍。倒灶之后，柴火与要烧个煤也就只得尽数撤去。倒灶也就被大家讲成了倒煤。倒霉是从倒煤来个。还有一个讲法，出典辣抽水烟用个引信“纸吹”上。以薄纸卷成笔杆状，点燃之后慢慢燃烧。上海人叫伊为“纸煤头”。纸煤头要用明火了，一吹就冒火了。勿用了，一触就熄火了。把纸煤头一不小心弄熄灭了，触煤头哉。从倒煤到倒霉，从触煤头到触霉头，读出来是一色一样个，写出来有了变化，我看搿多半是后来个读书人识得了交关文字个缘故吧。

　　上海人碰到了晦气个事体，就会大呼触霉头。“阿拉是新店开张，啥人拿垃圾倒辣阿拉店门口，存心是来触阿拉霉头，促掐【kak】!”就是碰到了勿顺心、勿顺当个事体，上海人也会冤枉鬼叫：“陪老婆、小囡到徐家汇去荡马路，阵头雨一记头倒下来，一家门马上变落汤鸡。霉头触得勿大勿小，气煞!”老上海人辣形容触霉头触得一塌糊涂个辰光，会迭能样子讲：“倒霉倒足，霉头触到了印度洋!”要晓得老早个上海人眼睛里，印度是老远老远、远得勿得了个地方。跑到介远个地方去，还会霉头触到触足，真是要呒没啥个闲话可以讲了。现在上海闲话里讲“霉头触到哈尔滨”，与老早讲法个意思差勿多个。上海闲话勿断变化，时时更新，与日俱进。因此上海人跑到外地、外国生活过十年、八年回来有点变得听大勿懂新个上海闲话，就勿奇怪了。

　　对于常常触霉头个朋友，上海人会称伊为霉鬼三。霉鬼三个绰号一旦被人家叫出了名，要想争取早日摘帽、回到人民个队伍里来蛮困难个。勿少上海人还是相当迷信个。见到人云亦云个霉鬼三，大家退避三舍，生怕霉气、晦气传染。因此上海人拨人家称之为小瘪三倒勿大会大光其火，但要称伊为霉鬼三，伊必定会骂侬一通山门个。当心。