【闲话闲画】世界杯：大家来忆苦思甜

　　文图/阿仁

　　巴西世界杯马上就要来了。现在看世界杯勿要太便当噢。世界杯从小组赛到十六强出线，从八进四、四进二到最后冠亚军决赛共计六十四场球，从央视到地方台大家都一场勿拉个实况转播。碰到同时开打个比赛，侬也勿必要去准备好四只电视机同步收看，电视台会随时插进另外几场比赛个精彩画面，让侬晓得战局个全貌。唯一吃力个是世界杯举办地如果辣欧美、非洲，侬就只好来熬一个月个通宵。只有2002年个韩日世界杯才让阿拉中国人适意开心了一趟，呒没啥时差，吃过夜饭看晚报，看过晚报看世界杯。呒没日夜颠倒，相当捂心。由此我支持阿拉中国也来主办一趟世界杯，让大家享受享受做东道主个快乐。

　　看世界杯也要忆苦思甜。上个世纪八十年代国门刚刚才撑开一点，电视台一因为时势、二因为设备还呒没本事和本钿来直播世界杯。只有老老关键个比赛和冠亚军决赛才播出几场，而且还是以事后录播为主。热炒弄成了隔夜小菜，味道打勿少折扣。看世界杯只看到冰山一角。为了让上海人能够先看一记，至少也可以先闻为快，新民晚报就开动脑筋、用足功夫辣报纸个版面上来最快、最全、最精个报道世界杯。搿是1986年墨西哥世界杯个故事了。要能够辣同一时间收看到远辣地球另一面个电视直播，伊个辰光只有解放军叔叔有搿样个设备和本事。报社派我和体育部个头头去罗店，伊搭里有一个部队个地面卫星站，要亲人解放军来支援阿拉个报道计划。部队首长最后拍板，辣伊拉完成日常任务之外为报社另辟一条电讯通道，让阿拉可以辣荧屏上实时看到墨西哥个所有世界杯球赛。就此阿拉十几个编辑、记者每天半夜就驱车去罗店。每一场比赛都有详尽记录。搞文字个写赛况，搞摄影个拍画面。伊辰光个电视机只有九英寸大小，还是黑白屏幕。球员小得像米粒，足球小得像芝麻，评论解说叽里呱啦，搿个使大家目勿转睛、全神贯注，生怕逃脱一个精彩镜头、一个关键讲解。球赛结束，大家集体撤退，赶回晚报去写稿子、编版面、上图片。报社每天留拨世界杯三四个版面，辣当时可以讲是对报道世界杯进行了地毯式轰炸了。大家做了一个多月个夜神仙，日伏夜出，吃力煞脱了，只是为了读者，让大家一睹为快。

　　看当时晚报个上海人现在至少也要有五十来岁了。