【闲话闲画】从荡马路到数电线杆

　　文图/阿仁

　　北方朋友称散步为溜达。上海个城里人称散步为荡马路。“一直孵辣屋里向，闷煞。今朝出去荡荡马路散散心。”荡马路是呒没啥个明确指向个，也呒没必定要买点啥个吃、穿、用东西个意向。反正一个人也好、几个亲戚朋友做搭子也好，跑到马路浪东兜兜、西看看，脚酸了就歇一歇，人吃力了就打回票。用现在个闲话来讲，搿个也好算是休闲生活个一档节目。老上海最早欢喜去南京路荡马路。南京路商店多，百货公司大，吃食店也勿少。辣南京路上荡一圈马路就算是空手去、空手还，也算是开过眼界、领过市面了。后来是淮海路领导时髦了。淮海路浪个妇女商店、大方绸布店、开瑞服装店、全国土产商店、上海西菜社、益民百货商店好像要比南京路更加洋气一点。到南京路去是土，到淮海路去是洋，阿拉年轻个辰光就是搿样来划分个。又后来开出了四川路。四川路是以价廉物美来出名个。到四川路去荡马路可以淘点便宜货回来显显宝。上海滩个“三街一场”当初就指个是南京路、淮海路和四川路三街。一场是豫园商场。上海人还是要称伊为老城隍庙。到老城隍庙去就难称为荡马路，里向是人贴人、人轧人，只好形容为轧闹猛。要勿是乡下头来亲戚白相上海滩，老上海人是难得会去城隍庙个。

　　早个几十年，上海人谈朋友谈恋爱个必备程序之一就是去荡马路。搿个也被大家称之为“数电线杆”。马路上个电线木杆一根又一根个计数过去，知心闲话讲勿光。十趟、廿趟数过电线木杆个就可以算敲定了。伊个辰光谈婚论嫁个成本太便宜了，用勿到去买名牌买名表买金银手饰。荡马路荡得肚皮饿了，一碗阳春面、一碗小馄饨就搞定哉。呒没听到过数数电线木杆就数穷了个恋爱故事。伊辰光大家一样穷、也一样富。

　　现在上海人也习惯用散步这个词了。“早浪向空气好，出去散散步。”“吃好夜饭去散散步，帮助消化减肥。”荡马路也变化成“出门兜一圈”了。好像是上海人有点嫌弃这个“荡”字了。东荡荡、西荡荡，游手好闲，与今朝大上海个快速节奏合勿上拍子了。数电线杆也落伍了。侬走我跟、我前侬后被四只轮盘代替了。“我开车来接侬！”“到甪直去兜兜！”“到西塘去转转！”还会去马路浪荡来荡去吗，勿用。油门一支，立马就到西湖、虎丘。奔向婚庆殿堂个步子要比老一代人快多了。