【闲话闲画】阿有坏个棕绷修伐

　　文图/阿仁

　　老上海个马路浪、弄堂里一日到夜可以听到勿勿少少个叫卖声。“桂花赤豆汤!五香酱油茶叶蛋!”“削刀磨剪刀!”“阿有坏个棕绷修伐籐绷修伐？”“卖糖粥!”“豆腐花!”每一种叫卖吆喝都拿腔拿调、都有程式。上海人只要听到熟悉个调头就晓得啥个小生意做上门来了。现在是听勿到了。只有唱滑稽戏个老滑稽还可以学唱出一长串，成为留住了老上海声音个保留节目。老姆妈九十有几，伊还用伊当初结婚辰光个红木大床。红木床个架子还相当硬扎，不过床个棕绷吃勿牢介许多年代个压力，勿但松脱哉，还破了一只手掌大小个洞。我讲，老早就可以向昨天告别了，买只席梦丝来睏睏吧。老姆妈勿同意。“搿只床睏惯了。伊个年纪也快七十了。侬还是出生辣搿只床浪个!想办法来寻个穿棕绷师傅，修!”啥个辰光还听得到“棕绷修籐绷修”个叫喊。啥个地方还找得到有搿门手艺个工匠。难。

　　还是老娘亲本事大。伊辣马路浪看到一个背着一袋棕绷绳子个老师傅，恰恰好是专门到东到西修棕绷个本地人。约定辰光，人家来上门服务了。我做帮手，拿棕绷床架子翻过来竖过去。盛上一面盆冷水，老师傅就动手修理了。伊也六十出头了，叫马袁斌。一个名字里有两个姓？“小辰光屋里向穷，过房拨了乡里个袁家。后来家境好了，又回转到本家。报回户口就恢复本姓马，就变成了马袁斌。我个儿子、孙子当然姓回了马。好马勿吃回头草？瞎三话四!哈哈!”马师傅做生活手勿停脚勿停，闲话也勿停。老底仔伊就是靠修棕绷修籐绷为生个，赚得全是辛苦钿。后来横扫资本主义，像马师傅搿样子个小商小贩也出勿了门、上勿得街。“阿拉伊辰光算是资本主义个尾巴。我搿匹马只好卷起尾巴做穷人。现在好了，解放哉。一个号头里我就算三天打渔、两天晒网也有五、六千块个收入。就是呒没去办过执照。我儿子开了爿小店，伊有正规执照个。啥个叫执照？就是赚铜钿个通行证!”马师傅不喝一口茶、不抽一根烟，三个钟头搞定，旧棕绷又绷绷硬了。老姆妈开心。“为啥侬勿叫几声修棕绷呢？”马师傅笑了。“现在用手机了。发张伲个名片拨侬。一只电话过来，伲马上就到。有熟人要修棕绷籐绷个，多多介绍!”马师傅走了。临了伊丢下一句闲话：“放心，保证质量。保证侬老阿太睏过一百岁!”