【闲话闲画】行头、皮子、大小打扮

　　文图/阿仁

　　天气一点一点冷起来了。秋冬之交与春夏之交一样，又到了“乱穿衣”个辰光。上海人讲乱穿衣意思是到了搿个季节，随便啥个衣裳都可以穿着，百无禁忌。天热起来，侬还是裹得严严实实。天冷起来，侬还是短衫打扮。只要侬受得了热、耐得牢冻，穿者随意。外国人还要结棍。我大热天辣巴黎见到过穿了裘皮大衣出来兜风个时髦女郎。我大冷天辣东京见到过套了个T恤衫上街散步个中年先生。功夫勿是一点点。上海人是蛮重衣着打扮个。老话讲：吃辣广州，穿辣上海。一点勿错。上海闲话把服装称作为行头。行头原来是梨园个行话，指个是上台唱戏穿个戏服。看来老上海人把出门上街看成是登台演出一般，凡是时髦时新个衣裳就讲成为行头了。“今朝单位里要开大会，领导还要我上台发言。换一套大方清爽点个行头去上班。”“明朝去吃外甥囡个喜酒，西装快点烫一烫。行头挺刮，勿好坍台。”旧上海还要势利，坐写台间必须洋装洋裤皮鞋。家境其实很寒酸，但行头还是合潮流。上海人戏称“西装瘪三”，是也。形容搿种样个朋友，上海人还有一句更促掐闲话，叫“勿怕屋里火烧，就怕路上跌跤”。一家一当，全辣一身行头里了。

　　早几十年，上海闲话个“行头”一度变为“皮子”。皮子是有点切口个性质，但也是风行一度。“喔哟，老王侬一身名牌，皮子瞎挺！”“勿要看小李子三日两头翻行头、换皮子，其实伊是脱底棺材，外头背了一身债！”不过上了点年纪个老上海人是勿作兴讲皮子长皮子短个，此言一出，是要失风度、跌身价个。

　　上海个女士、女生假使浓妆艳抹、打扮入时，就会被称作为大打扮了。有能力来大打扮个当然是大人家太太、小姐。一般个小康人家走出来个女人容貌略作修饰，衣着虽简朴但入眼，那就称之为小打扮了。依老上海个评分标准来衡量，现在上海滩上，哪怕是地铁站里女生多多少少都是大打扮了。头发是染过做过个，面孔是拍过粉个，口红是抹过个，眉毛是画过个。连眼睫毛也是假个，只是有个假得太过份了，像眼睛上安装了两把大蒲扇，一上一下扇出风来。更煞勃个是超级打扮也上市了，可以把一个东施化妆为一个西施。因此凡有被传媒被网络称为“美女”个，多半只是寻常容貌，为之围观个只是上当。比超级打扮更利害个是拼命打扮。拼命打扮是去美容院动刀动枪整容了。去韩国勿问青红皂白就整容个真是拼命娘子。讲句上海闲话来感叹：“呒没闲话哉！”