【五香豆】6粒+1粒=？

　　文/马蒋荣

　　幼儿园大班个陈老师，昨天仔刚刚结束美洲8日游回到上海，十几个钟头辰光坐飞机告时差影响弄得人筋疲力尽、头七荤八素！本来准备好休息一天，调整调整，勿料，李园长来电话讲幼儿园人手实在紧张，听讲伊回来了，所以想商量可否先克服一下来上班。其实陈老师近十天呒没看到伊拉班级个小朋友，也交关想念，于是来勿煞及一早就赶到幼儿园报到。

　　第一堂课齐巧是幼儿园特色课：“学讲上海闲话”。陈老师就先拨小朋友们出了一道算术题：6粒+1粒=几粒？小朋友们侪回答“7粒”！陈老师讲：“对个，大家交关聪明，是7粒！不过，陈老师今朝讲个‘吃力’是上海闲话当中人呒没力气个‘吃力’，勿是数量词‘1粒、2粒、3粒、4粒、5粒、6粒、7粒’中个‘7粒’！昨日陈老师刚刚旅游回到上海蛮晏，所以老‘吃力’个，请小朋友大家上课侪用心听好哇？”“好个！”小朋友们齐崭崭个回答。