【闲话闲画】贼骨头、贱骨头、作骨头

　　文图/阿仁

　　贱，小偷是也。上海人还称小偷为贱爷爷、贱伯伯。之所以把小贼、老贼个辈份都升了一位，实在是因为大家看到小偷小摸个人都头疼，敬而远之。一旦单位里个写字间、会议室、更衣室里勿明勿白少了东西钱财，大家疑人偷爷，辣呒没挖出混辣人堆里个贼爷爷，人人都莫名其妙个成了嫌疑人、成了疑犯。因此上海人还把人人痛恨个小偷叫作贼骨头。偷窃个恶习已经长到人个骨头里了，恶习难改，本性难易。老上海人要辣弄堂里、马路浪发现窃贼，勿大会呼喊：“有小偷！捉牢伊！”

　　而是大喊大叫：“捉牢伊！伊是贼骨头！”蛮发噱个是还会有人把“贼骨头”当作口头禅个。上海围棋圈子里个曹志林八段就常常把“贼骨头”挂辣嘴边。自家一时寻勿到东西：“贼骨头！”人家约会迟到了：“贼骨头！”与人过招着棋，对手出了妙棋，更加要哼一声：“贼骨头！亏侬想得出搿一招！搿招肯定是偷得来个！”

　　除了“贼骨头”，上海闲话里还有一句“贱骨头”。贱骨头原来是小小囡白相个一种玩具陀螺。要陀螺立地勿停个旋转，要用细绳鞭子顺势勿断个抽打伊。越抽越转，越转越抽，隋性十足个人，靠了别人勿断个督促个人，就成为了上海人眼中个贱骨头。贱骨头还有一层意思，即无端个四处招惹是非。人家已经勿理勿采侬了，但是侬还勿依勿饶个去挑逗人家，侬基本上会收到一声骂：“贱骨头！侬可以歇歇了。讨惹厌！”上海人常常是骂皮小囡才用贱骨头个。“刚刚打碎脱一只茶杯，现在又去摸茶壶了。贱？真是贱骨头一只！”小辰光要是拨大人骂到搿一层，就是要打屁股、吃生活个前兆了。快点识相。

　　贱骨头有点是专为小朋友所设置个。要请大朋友吃排头，上海闲话就称之为“作骨头”。作骨头，是从作天作地、作死作活里引申出来个。作，呒没一点名堂个吵吵闹闹、哭哭笑笑。随着上海闲话托福个普及，勿少外地朋友都理解明白了“作”。上海小姑娘个作已经名闻天下。作辣搿搭是散发出发嗲个气味个，作得男朋友一点都吃勿消，辣手。不过作骨头要用辣爷叔、阿爷、阿伯身上，就是指搿点大男人无事无非、呒头呒脑个瞎折腾、乱起哄。“肉勿吃，鱼勿吃，鸡勿吃，蛋勿吃，侬叫我到小菜场去买啥个叫荤小菜回来烧！我看侬是老了，作骨头！拨侬作煞！”

　　上海闲话里还有啥个以骨头用来形容各式人等个？待查待考。以后再讲。