【闲话闲画】踵头、寿头、滑头、木头

　　文图/阿仁

　　又要过年了。过春节个节目单上吃是重头戏。吃酒、劝酒、灌酒、拼酒是上海老男人个重中之重。勿吃到酒水糊涂决不收兵。好几年前，我是酒喝多了。朋友老刘执意要开车送我。伊也吃酒吃得走起路来七歪八牵了，以现在个讲法是醉驾了。一部普桑是开得走走停停。亏得半夜三更马路浪勿见人车才呒没闯穷祸。后来只好停下车子困觉。一【huak】到天亮。近来又碰到老刘，问伊还会勿会吃过老酒去开车子。伊讲：“侬当我是踵【cong】头啊？吃酒勿碰车！勿单单是为了怕警察检查，还是为了大家个安全。社会发展了，自家要识相……”搿只老牌子踵头终于进步了。上海闲话里的踵头就是指出头鸟、欢喜事事冲辣最前头个人。踵头也有写成冲头个。不过专家认为如此辣声调上勿够确切。业余爱好者图个方便少写几笔发发短信也就马马虎虎算通过了。踵头还有另外一层意思，即被别人敲了竹杠而多花了铜钿个朋友。“搿只手表是大卡个。侬做了一记踵头了。”勿做踵头个要诀是“宁停三分，不抢一秒”。凡事要冷静点，多多盘算所言所行个后果。做踵头是戆大。切记。

　　老是做戆大个人，上海人称之为寿头。勿但傻，而且还百般坚持、硬撑到底个人就成了上海闲话里个寿头码子？有一点点寿头寿脑个朋友还是蛮可爱个。但是寿到死勿领笨、勿肯听从别人好意相劝个脚色，上海人对此更促掐个讲法是“一只寿棺材”。勿见棺材勿掉泪，是也。以寿、以寿头来自嘲自己讲了傻话、办了傻事也是常常可以从上海人口里听到个。

　　与寿头正好相反个上海闲话为滑头。滑头顾名思义就晓得搿样个人油滑得很，讲一套、做一套，勿守诺言，勿讲信用。从滑头引申出来即是滑头货。滑头货可以指人：“侬还敢相信伊？人人都领教过，伊是一个滑头货！”滑头货可以指物：“搿条马路浪呒没几家正宗店家，大多数是卖卖骗骗人个滑头货！”不过上海人还会用小滑头指十分聪明、交关乖巧个小囡、小青年个。此时小滑头有点像爱称了，表达了老长辈个满心喜欢。“喔哟，几个小滑头也来了。今朝闹猛了！”

　　普通话里木头木脑个人，上海人简称为木头、木头人。“新来个伙计是一块木头，拨都拨勿动。”“阿拉先生进了厨房间就是木头人，连几只碗盏都汏勿来！”上海人对各种各样性格、脾气个人个称呼都简化了，以一个“头”字概括。还可以寻出勿勿少少个头来。以后再表，留一点噱头吧。