【闲话闲画】热水袋、汤婆子和焐窠

　　文图/阿仁

　　日脚越过越好了。用时髦个讲法是生活质量提高了。交交关关老辰光用个取暖、保暖个日用品退出了历史舞台。先讲热水袋。以前个上海人屋里向少勿脱有一只、几只热水袋。热水袋是用橡胶做成个。冲进热水甚至开水后拧紧盖头，就可以用来取暖了。刚刚灌进烧得哒哒滚个开水，怕烫痛人，就缝一只棉布袋子套上。考究一点个人家，就以绒布来做套子。热水袋捧辣手上、焐辣胸口也算是老上海冷天里个一道风景线。辣旧上海用热水袋个人家要算是小康之家了。穷人家还买勿起热水袋个。就是到了上世纪七八十年代，节约为本个上海小姑娘、老阿姨就用吊光了盐水个玻璃瓶来代替热水袋。办公室写字台上常常可见一只只盐水空瓶。伊个辰光拖一只盐水瓶走来走去勿算坍台个。现在办公大楼里有了中央空调再加立式空调机，热浪滚滚，冷天疑似春天。大家个屋里间也一样，冷天只关辣窗外门外。热水袋、克隆热水袋个盐水瓶都消失了。

　　比热水袋更早淘汰出局个是汤婆子。汤婆子是以黄铜铸成个，扁圆形状，与现在比赛用个冰壶蛮像。只是汤婆子要小上一号。铜做个汤婆子过于导热，太烫手了。因此冲进开水后就塞过被头洞里来预热被窝。习惯使用汤婆子个一般是老人和小人。汤婆子个出典大概就来自于此——烫“婆”、“子”。年轻人轮不上焐汤婆子。用汤婆子有风险，常有伊烫伤人个记录。穿街过巷个铜匠摊子来维修破漏个旧汤破子。辣当时一只优质汤婆子也要老价钿了。精心保护是必须个。汤婆子陪人困觉。天亮之后就出空身体，伊壶里个水还有余温，用来主人家早晨洗脸汏手。一点点勿浪费是上海人家个持家传统。做人家，一滴温吞吐水也勿舍得。

　　保暖个是焐窠。相信如今个80后90后勿会认得焐窠。焐窠是用来保温饭锅个。多用稻草编扎而成，还配有窠盖。烧好个热饭热粥就焐进草窠。还会以小个棉被来塞实、塞紧焐窠里个空隙，力保勿失一点温度。一家人到吃饭个辰光能够保证有热汤热饭，品相土气个焐窠功勿可没。人丁兴旺个人家用一只焐窠还勿够，要配备大小好几只。谋杀焐窠个是电饭煲。可以炊饭、煮粥、煲汤个电饭煲身材小巧、外观漂亮、功能齐全，气走了与上海人相伴久远个焐窠。要看老底仔个、每户必备个、卖相推扳个焐窠吗？到上海民俗博物馆去寻寻找找吧。运道好，还见得到。