【闲话闲画】闷声勿响大发财

　　文图/阿仁

　　过年放炮仗。上海人把鞭炮、爆竹统称为炮仗。阿拉小辰光是几十年前头个事体了，伊辰光过新年几乎家家人家都去买点大小炮仗放放。大炮仗又叫做两响头，与北方人称之个“二脚踢”意思一样。点好药线，“乒！”蹿到半天高。“叭！”炮仗辣空当中爆炸。大炮仗个大小按长短来区分，有五寸、七寸个规格。大人放大炮仗。放辣水门汀上点竖好个大炮仗是勿够有腔调个。一手捏牢炮仗个中端，伸直手臂。另一手点火。很少有炮仗辣手里开花而炸伤人个。老早仔个鞭炮质量高。后来炮仗是越做越大、越做越粗，质量却是越来越推扳。大家怕吃苦头，炮仗就只好脱手放辣地上去放了。小人只可以放放小炮仗。一长串小炮仗一记头放脱实在舍勿得。烟纸店就把整包整串个小炮仗拆开零售，专做小朋友个生意。弄堂里个男小囡新年里衣袋中必有几只、甚至一把零碎炮仗。一有机会就放几只来吓吓别人，老少无欺。也因为如此捣蛋，被手脚快个大人一把搭牢，头上吃几只麻栗子是逃勿脱个。掼派头个大人家一口气会连牢放好几串炮仗。乒乒乓乓声响一停，胆子大个小囡就钻进烟尘里去拣哑炮个炮仗。哑炮依旧可以带来很多个乐趣。一拗两，中间个火药一点还能放出嗞嗞声响搭两道交叉个火花来。搿种白相方法有个摆不上台面的讲法，叫：“——”现在勿晓得个小青年可以去问问屋里向个长辈。一把年纪个老上海人呒没勿知道个。哈哈。

　　拨小囡白相个鞭炮还有一种叫放兰花。伊只是尺把长个细纸卷了一线长个火药，只发火花勿发声音。要天暗了放才好看。还有一种叫掼炮，勿用点火，只需用劲朝硬地上一掼就有大响声了。掼炮危险，常常会勿扔就炸，大人是勿作兴买掼炮拨小人个。皮小囡是用压岁钿偷偷去买来辣弄堂里开炸。乖小囡放炮仗只是找点砖缝墙角来塞点小炮仗放放。过年之后，一条弄堂个粉墙都受伤了，焦痕斑驳，烟灰点点。搿是新年走过个痕迹，勿是脚印，胜似脚印。

　　现在放炮仗是打仗了。鞭炮做得威力巨大。放焰火变成放礼炮。大礼炮盒子比樟木箱子还要大。有个还要用铁制个炮筒来射击超大炮仗。一看见马路上、小区里有人抱团来放炮仗放礼花，大家退避三舍。我是反对放炮仗大型化、集团化个。城市里是勿允许处处可以来放一通炮仗个。近年来上海人过年勿放炮仗个人家多起来了。放炮仗发财开始变为勿放炮仗、呒没动静来恭候财神菩萨了。搿叫做闷声勿响大发财。有了铜钿银子勿乒乒乓乓，决勿露富。安全。