故事新编《中秋之夜》

　　水调歌头 中秋

　　故事新编《中秋之夜》

　　垃拉密州做官个苏东坡已经有的整整七年呒没搭伊个同胞兄弟子由碰头了，伊邪气牵记伊个弟弟，常庄垃拉梦头里向搭弟弟见面，不过，醒转来勿看见弟弟个影子，就更加觉得凄凉悲伤了。

　　搿日正好是八月十五中秋节，苏老先生一介头垃拉花园里向吃闷酒，伊又想起仔伊个弟弟子由来了，葛是老酒一杯接一杯个，吃得来有眼眼醉醺醺个了。

　　勿晓得啥个辰光，一轮明月已经升到仔头顶心浪了，地浪向是一片银白色个月光。苏老慢吞吞个立起身来，手里向拿仔一杯酒、抬起头来，呆顿顿个望拉天浪，唉，伊真想搭天老爷攀谈攀谈：“有道是，天浪一日、人间千年，天老爷啊，勿晓得今朝夜里，搿天浪向算阿里一年呢？”

　　苏老回到椅子浪向坐停当，手浪向个一杯子老酒又是一饮而尽，搿个辰光，伊个眼睛有眼迷迷糊糊个，只觉得自家好像乘仔一阵清风飞回到仔天浪向去了，看呀，美玉砌成功个广寒宫漂亮得勿得了，不过，介高个地方实在是冷得来吃勿消！

　　一向浪漫豁达个苏老先生又立起身来，伊觉得自家老想垃拉月光下头跳舞个，月亮、伊自家还有自家个影子，一道翩翩起舞，勿再孤单，实在有意思。“讲一句老实闲话，到天浪向去做啥呢，搿还是人世间好啊！”苏老一介头自言自语。月亮还是慢慢叫个垃拉天浪向移动，月亮光从朱红色楼阁个一面转到仔另外一面，雕花个窗框浪也涂满浓浓个月色。苏老心事重重，一眼呒没睡意，伊浑身上下就好像披仔一袭银白色个长袍。

　　苏老垃拉花园鹅卵石铺就个小路浪走仔几步，伊抬起头来，面对天浪个皓月，伊又开始自言自语：“派派月亮勿会得有啥个怨恨个呀？葛末为啥个事体，偏偏垃拉人家别离痛苦个辰光反而圆满无缺个呢！月圆人勿圆，痛苦啊！”搿歇辰光苏老满脑子侪是弟弟子由个身影，挥之勿去。

　　“人有得离别辰光个悲伤、葛末也有的团聚辰光个欢乐，一样个道理啊，月亮也有得阴晴圆缺个转换，迭种事体从古到今，侪是难以周全个。”想到搿搭，苏老先生豁然开朗，老人家一下子变得邪气个精神。伊想：是呀，只希望世界浪向所有个亲人，大家侪平平安安、健健康康，虽然远隔千里，也侪能够共享搿美好个夜晚、美好个月色。

　　搿歇辰光，苏老好像看到了同胞兄弟子由正笑眯眯个朝自家招手呢……