今日空气质量  
您现在的位置:首页 > 上海闲话 > 灶披间 > 正文

诸暨年糕

2013-02-27 15:50
来源:新民晚报         新民网编辑:田诗雍    作者:钱汉东 T | T 字号: 打印 参与评论(0)

  文/钱汉东

  壬辰岁末,西施故里诸暨乡亲搭我送来了家乡个年糕,让我欣喜勿已。我对诸暨年糕情有独钟,辣我小辰光个记忆里,年糕占据了重要个位置。搿个年糕白亮白亮个,上面还有一条条细细个纹路,闻辣海就有股稻米清香,吃辣嘴巴里滑滑个、糯糯个,软软个,还有嚼劲,一眼也勿黏牙齿。

  年糕是江南个特色食品,具有久远个历史。家家人家过年个辰光侪会得自家做年糕。小辰光我回老家省亲,春节将至,家家侪要拂尘洗涤,除旧迎新。最让我期待个是 “舂年糕”之“盛事”,辣辣乡里,搿个是顶闹猛个辰光,“新年”个序幕就辣“舂年糕”辰光拉开了。

  台门廊檐下闲置老长辰光个石臼搬了出来,女人家拿石臼里里外外汏得清清爽爽,然后移到客堂间,几张八仙桌浪,准备做年糕个粉摆辣海,迭个“年糕粉”由糯米搭晚稻粳米粉合成,揉成一个大粉团,上蒸笼蒸,蒸熟以后从热气腾腾个蒸笼里拿出,再摆辣石臼里,再由几个男丁一道抬起一个巨型长柄木槌,上下自如个捶捣石臼里个大粉团,“呯、呯”个声音有节奏地传出,悦耳又动听,感觉人心捣鼓得痒痒个,恨勿得立马放到嘴里解解馋。石臼旁坐个老人,用蘸上水个双手,用力个翻动石臼里个年糕粉团,配合木槌上下捣击。当“年糕粉团”反复捶捣得勿再黏手了,就拿伊摆到八仙桌浪,整个台门个空气里弥漫着稻米个醇香,邪气诱人。大人们有说有笑,勿时还会弄个小粉团,叫我先尝尝。我老高兴个一面急来死扯一小团塞进嘴巴,一边豪燥拿剩下个粉团拉捏成像上海粢饭团样个大小,分别嵌入底部刻有各种图案、花纹个长条形红木年糕印模里向,乃末,用手辣“年糕粉团”浪用力揿几记,再拿印模倒扣辣台子浪,年糕从印模里“脱颖而出”。我个兄嫂们心灵手巧,伊拉还会捏大元宝及小白兔、金鱼、小狗、公鸡等小动物,并拿动物们染上红绿颜色,真个是栩栩如生。我总归小心翼翼个收藏好,拿伊拉带回上海拨拉白相个小伙伴欣赏,扎台型噢!

  埃个辰光亲眷屋里并勿富裕,屋里余粮勿多,舂个年糕也勿多,不过当阿拉要回沪个辰光,乃末搿家送10条,埃家送8条,总归让阿拉拿勿动为止。回沪后我姆妈又会拿年糕赠送上海个亲友,还要捎带一句吉言“年年高”,让亲友们一道分享过年个快乐。中国年糕文化个内涵辣辣老百姓当中得到了最好个演绎,难怪伊生生不息得以传承。我实地考察过,阿拉祖先种植稻谷历史悠久,汉代已有类似年糕个记载。

  现在个年糕侪用机器做了,勿见了当年“舂年糕”热闹情景,缺失了令人回味个情调,难免有些遗憾,好在家乡个清澈水质搭优质粳米,让诸暨年糕仍旧保留了老味道。吃了乡亲送来个年糕,回味小辰光看到个“舂年糕”场景,让我辣辣寒冷个冬天里,心头却是热乎乎个。

(新民网编辑:田诗雍) 
今日热点

发布评论

评分:
1 2 3 4 5
 / 0 人已评
>>已有20条评论

您还能输入140

同时转发到上海滩微博
  • 数据加载中……

微访谈

微言博议

微辩论

投票成功 “做民调 赢大奖”转盘抽奖 科沃斯地宝、交通卡、面包机、数码礼包、象印保温瓶等百份奖品等你拿 去试试手气
您已投过票 “做民调 赢大奖”转盘抽奖 科沃斯地宝、交通卡、面包机、数码礼包、象印保温瓶等百份奖品等你拿 去试试手气