老早地个零食

　　文/蒋焕蕾

　　小辰光自家发明个零食也蛮有味道个。

　　寻着外婆囥拉灶披间碗橱最下面一层个瓷罐头，拉牢伊二只铜环拖出来，捏牢盖头浪个滴滴头，打开里头是黄皮纸包个怕受潮个吃食。底浪向还铺老厚一层生石灰。大包小包一包包寻过去打开来看，总算翻到了红糖，掸脱纸包外面白乎乎个石灰粉，抖出一眼红糖放到铁镬子里，用小火慢慢加热，等伊一眼一眼烊开来，再用镬铲铲拢、压紧。慢慢压、慢慢拢，最后压成功一只只咖啡色个像橄榄样子个糖核。冷脱后包辣纸头里，慢慢叫含，慢慢个享受。要是压得勿紧，乃末放了嘴巴里一歇歇就碎开来，满嘴巴红糖屑吃起来就呒没劲道了。做得好个闲话，觉着比大白兔、椰子糖还要好吃。药店里买一分洋钿个甘草有好几根。搭同学或者邻舍隔壁个小朋友一道分分，轮流做庄。甘草含进嘴巴里当零食吃，甜津津，省一眼个闲话，一根好吃好几天。

　　胖大海用开水泡好之后，发得来老大个，又大又胖，可以一只碗放一颗。想象伊跟白木耳一样，就是颜色勿搭介。放一眼白砂糖进去就好吃了。勿过吃个辰光比较麻烦，一歇勿停个要挑脱上面个筋筋襻襻。用罗汉果泡茶当糖水喝，实在甜得勿一样，试了二趟也勿吃了。再听从内蒙建设兵团回来探亲个邻居阿哥阿姐讲，晓得蒙古族人每日要吃奶茶个，我想肯定是老好吃个，我就抓眼茶叶，调好奶粉，用调匙捣均匀后，颜色老嫩老好看个。吃进嘴巴里既有奶香又有茶香。

　　有一段辰光，感觉交关上海人侪辣做红茶菌，讲是吃了身体好。我就跟邻舍隔壁学，垃拉一只玻璃缸或者大口玻璃瓶，看见里头半缸铁锈色个水，漂辣海或大或小个有须须头个深铁锈色个菌。看上去搿种介氽拉海个毛拉拉、污糟糟个物事，有眼吓人，腻心八腊，实在吃勿下去，就是吃下去个人，好像毛病照生。

　　当然，麦乳精干吃、炒麦粉装辣纸头折个猪头里向、球里向，用手扯二只猪耳朵，一记一记，让粉喷到嘴巴里，搿是香喷喷个，是趣味性个吃法了。