螺蛳是农民的“鲍鱼”

　　文/任向阳

　　江南水乡到处有得螺蛳，开春了，螺蛳不再迓东迓西【东躲西藏】，伊拉大大方方地从水草下头氽到水面浪向，从壳壳里伸出叶盖，探出头来，吧嗒吧嗒地吃起绿颜色的藻类，因为饿了实实叫一个冬天，伊拉用足仔劲道来吃，就搿能介，吃到清明快，螺蛳的营养补足，体型长足，已经又青又大了。迭个辰光，河浜里的水比较清爽，螺蛳肚肠里向的小螺蛳还生了勿多，是一年当中肉质顶顶嫩胖、味道顶顶清鲜的吃螺蛳的好辰光。

　　格辰光捉螺蛳也便当来西的，垃潮水退脱以后，拿只小的网兜到河滩边浪朝睏垃烂湿泥浪的螺蛳抄上去，兜着仔再放到水里漂漂就可以了；或者到河水退得只挺着着【最最】当中一条狭来西的河道的日脚，穿仔高统套鞋，直接走到河浜边头，看见阿里搭【哪里】有螺蛳就弯腰用手拾起来；也可以专门用长竹头扎的耥螺蛳网到水深一眼的河浜、水塘当中沿着塘底去兜耥一团一团沉垃海的外壳墨墨青的螺蛳。

　　螺蛳捉回来还要用河浜水或者已经垃盆子里搁过几日的水静养两三日。假使从农贸市场问农民买得来的螺蛳，一般也常常会得已经剪脱了尾巴，省得买小菜人拿回去再花功夫弄了。

　　回到屋里，要拣脱空的、发臭的坏螺蛳，拿螺蛳倒拉垃篮头或者盆子里汏清爽，汏的辰光就像淘米一样哗啦哗啦淘，利用螺丝外壳的摩擦来嘠脱【搓掉】龌龊，考究一眼的，也可以用刷子刷。然后拿螺蛳养到盆子里去，等搿排好了，静下来了，螺蛳就会得郁法郁法【游来游去】窜到水面高头，像只吸盘一样，用一只薄来西的猩红色叶盖贴牢仔盆壁，慢慢叫拿螺蛳壳荡下来，舒展开身体，吞水吐泥沙了。当然，吸垃盆壁高头的侪是体格强壮，调皮捣蛋的料作【家伙】，有得大一半的螺蛳仍旧是定定心心浯【挤】垃盆里，伸出头仔吞吞吐吐地蹲垃海【住在这里】。

　　螺蛳一般可以养伊个两日天，要经常换水。假使大热天，当天早浪养到吃夜饭辰光就够了。要是垃拉清明节后头（主要是小螺蛳已生出来），可以垃水里向滴一眼豆油或者别的烧小菜的油下去，油闷牢仔水面氧气减少，螺蛳的呼吸加快，吞吐越加忙，泥沙、龌龊排出去的力道加大、小螺蛳也慢慢叫从剪脱屁股的尾巴洞里向汊【排泄】出来了。两日天养下来，螺蛳的肚肠就没杂质了，养清爽了，只要多放点水，汏汏伊，沥脱点水就可以烧来吃了。

　　习惯浪向红烧螺蛳比较受欢迎。拿油镬烧热煸香生姜告蒜瓣，“嚓——”一记螺蛳倒进镬子，大火铲刀翻炒一歇，烹黄酒，倒奉贤出的“鼎丰”酱油，加盐、白糖，倒少量水（喜欢吃辣的朋友也可以加几段辣椒干），加盖闷笃四五分钟，开盖加一眼生抽吊鲜，中火翻炒两三分钟，到螺蛳盖头脱出来，或者汤水收到一半关火，撒小葱上去，就可以起锅装盆。这红烧螺蛳噢，是农民屋里向的家常名菜，一是便宜，两三块一斤，原料到处侪有；两是好吃，清明前头的肉顶嫩，有眼像小点子的黑颜色的“鲍鱼”，耐咬嚼，还蛮嫩，肚肠也吸进了汤水的鲜味，嗍【吸】进嘴里嚼嚼伊别有风味；三是营养，中医讲起来螺蛳味甘、性寒，可以清热、明目，消渴，是“利大小肠之药”，是食补的好小菜。告老【所以】有趟我听得一位出身农村的领导对北方来的朋友讲：“螺蛳啊，这就是农民的鲍鱼！”

　　其实阿拉上海的交关城市居民也老欢喜吃螺蛳的，前两日就有人问我：“螺蛳是剪脱仔养好还是勿剪脱养好？”我讲，勿剪脱可以养比较长辰光，吃的前头至少再要剪脱仔养半日，这是比较考究的作派；剪脱仔养么比较省力（菜场摊主已经代劳了），顶多勿要超过三日。还有，阿拉亲娘【无锡人对“奶奶”的称呼】有个窍门，拿米泔水养“蛳螺”（无锡人反过来把螺蛳叫‘蛳螺’），螺蛳会吸收营养，长得更加结足【肥实】，吃起来味道还要崭【好吃】。