泡饭交关有讲头

　　文/秦来来

　　上海人个“做人家”（精打细算）是有名个，就讲每日天个早饭，绝对勿会经常吃大饼、油条、豆腐浆，老多人家每日天个早饭，就是——吃“泡饭”。

　　阿拉小辰光吃泡饭是家常便饭，早浪向起来一顿早饭，一般人家侪勿讲究，特点是：简单、快捷。“泡饭”就是体现搿个特点个最好个食品。

　　啥个叫“泡饭”呢？就是拿剩下来个米饭，加点水，再摆辣炉子浪烧一烧，等到水滚了，泡饭就烧好了。假使勿是冷天，只要用热水瓶里个开水冲泡，就可以吃了。到了大热天，用冷开水一泡，也可以吃了。米白汤清、清淡无油、绿色安全，胜过“方便面”。

　　苏州人拿搿个叫“饭泡粥”，小辰光一直呒没想明白；现在想想有道理：前头剩下来个“饭”，用水“泡”开来，一烧变成“粥”，所以叫“饭泡粥”。

　　阿拉小辰光烧饭呒没电饭煲、高压锅，侪是煤球炉，烧饭个辰光，要用小火慢慢个烘，所以锅底都会结一层饭茨【shy锅巴】，用饭烧个泡饭有点焦黄颜色，特别香。假使肚皮饿个辰光，拿饭茨包一眼白糖，“咯吱咯吱”一面咬一面嚼，甜中带香，就是阿拉伊辰光美味个点心了。

　　阿拉本地人还有一种习惯，就是拿吃剩下来个小菜，推扳点个青菜、豆腐，考究点个蹄髈、小排，挺括点个火腿、咸肉，全部倒了一道，烧泡饭，名称就叫“菜饭汤”，搿个真是“味道好极了”！可惜个是，当时因为生活清苦，难得有机会大鱼大肉，因此难板能够有机会吃到“考究”、“挺括”个菜饭汤，告咾勿会对身体健康产生勿利影响；现在条件好了，大部分人倒过来营养过剩了，再吃搿种“菜饭汤”，就会引起尿酸增高、血脂增高、胆固醇增高……有害无利。

　　再后来，高档饭店里开始卖“泡饭”了，不过伊拉迭个“泡饭”已经走样，侪是用海鲜，像龙虾、象拔蚌、鲍鱼当浇头；还有干脆就是“鱼翅泡饭”，搿个绝对勿是一般老百姓能够享受个。更何况吃鱼翅已经遭到了“环保”人士个反对，吃个人越来越少了。

　　我平生最难忘个一顿“泡饭”，是辣拉一万米高空个飞机浪向吃着个。伊一年，我随东方航空公司去巴林，搿个是一个阿拉伯国家。因为是中巴首飞仪式，所以我伲辣伊搭块停留了一个星期。入乡随俗，阿拉很少吃到家乡个饭菜，有一趟去一家“中国菜馆”，吃出来个味道终归勿对。结果了解下来，厨师是个巴基斯坦人。辰光一长，胃口倒脱了。回国途中，我辣飞机浪呒没胃口，对于空姐拿来个食品我侪是摇手回绝。

　　因为乘个是东航飞机，伊拉对阿拉个情况比较了解，晓得阿拉辣巴林可能是伙食勿习惯，倒胃口了。一个空姐来到我个身边，轻轻个对我讲，“秦老师，我搭侬准备了一样食品，侬一定欢喜个。”我讲，“勿可能个，啥物事？”“咸菜毛豆，过泡饭”。伊轻轻叫个一句，对我来讲，好比大热天雷雨前个一声响雷，“真个？”

　　我开心煞了。等我一口气拿“咸菜毛豆加泡饭”全部吃光，我迫勿及待问伊拉，飞机浪哪能会有搿个物事。伊拉搭我讲，因为经常要飞国外航线，好多人对西式食品也是难以接受，经常厌食，对工作带来影响。因此伊拉就准备了一些上海人最喜欢个、弄起来又是最简单个食品，作为预备。由于伊拉个贴心，让我辣拉最难过个辰光，吃到了最有上海味道个“泡饭”。伊拉搭我讲，有一次吴邦国同志也是外访回国途中，乘坐伊拉执行个航班，同样是因为胃口勿佳勿思饮食，结果当伊拉拿出“咸菜毛豆加泡饭”个辰光，吴邦国一下子胃口大开，终于饱餐了一顿。

　　真是：泡饭养生、淡味静心，滋味其中，难忘其妙。故土难离，乡味独好，一碗泡饭，陪伴终老。