普通话同音字在沪语中个“变异”

　　文/沈寿仁

　　普通话里向有种同音字（指声母韵母侪一样，只是四声勿同）到了上海话里向，会发生“变异”，读音完全两样，年纪轻个朋友有辰光会读错。比方有一趟，我看到一档沪语电视节目，讲甘肃永昌县有些人长得是高鼻头蓝眼睛，告欧洲人一模一样。伊拉到别个地方打工，一口永昌闲话，弄得别人稀里糊涂，侪讲搿排“外国人”中国闲话哪能讲得介灵光！其实，历史学家考证下来，讲伊拉是多少多少年前头，一支古罗马远征军个后裔，虽然外貌还保留了伊拉老祖宗个基因，实际浪老早就是的的刮刮个中国人了。节目里向，一位上海闲话讲得蛮好个女士，讲到永昌县却是“永昌‘盐’”、“永昌‘盐’”讲了好几遍，实在令人惊讶又觉着好白相。

　　伊勿晓得，垃拉普通话里向，“县”搭仔“先”、“现”咾啥发音差勿多，到了上海话里向，伊拉个发音却分道扬镳哉，“县”勿跟牢“现在”个“现”发“盐”个音，而是告公园个“园”、永远个“远”个发音差勿多了，所以永昌县应当读作“永昌‘园’”才对。

　　搿种跟牢普通话读而读错个情况，虽然并勿多见，但大概是现在80后90后个上海青年讲沪语搭仔想学上海闲话个“新上海人”总归要碰到个难题。下面我举一眼普通话里向个同音字（四声仍旧不计）到仔上海话里向，读音却截然不同个例子（勿管一组4个字，还是3个字2个字），看看想学沪语个朋友读得准?

　　或、火、活、霍（huo）

　　丫、压、鸦、牙（ya）

　　左、坐、作、凿（zuo）

　　残、惨、蚕（can）

　　贺、赫、鹤（he）

　　差、查、察（cha）

　　唤、焕、幻（huan）

　　加、夹、佳（jia）

　　华、滑、化（hua）

　　于、鱼、玉（yu）

　　植、职、指（zhi）

　　轴、粥、帚（zhou）

　　朱、助、祝（zhu）

　　场、唱、偿（chang）

　　态、泰、台（tai）

　　操、漕（cao）

　　车、彻（che）

　　居、局（ju）

　　宅、寨（zhai）

　　开、楷（Kai）

　　看、刊（Kan）

　　录、路（lu）

　　埋、麦（mai）

　　木、模（mu）

　　南、难（nan）

　　潘、攀（Pan）

　　时、食（shi）

　　外、歪（wai）

　　下、瞎（xia）

　　学、雪（xue）

　　眼、严（yan）

　　以上例子只是随便举举，其实搿种“异读”情况有得交交关关唻，大家只有垃拉日常生活中讲上海话个辰光，慢慢体会。