啥体要帮忙“揿鼻梁”？

　　文/宗为

　　七里缠辣八里，当一个人来到一座新城市，听勿懂当地方言，日常生活工作中常常容易弄出搿能伊能个笑话、误会。第二届主持人沪语大赛初赛第一二场秋深、贺梁两位选手辣自我展示环节讲故事，勿约而同讲到了迭种情况。

　　秋深个一位同事是新上海人，有次辣大商场购物乘电梯，因为伊立辣按键位置，后进个一位本地人对伊讲：“请帮忙揿一下B2”，伊个第一反应是“莫名其妙！要我帮忙揿鼻梁干嘛？”本地人看看呒没反应，心想举手之劳个事体也勿肯，乃末稍提声调再一次要求：“揿一揿B2呀！”口气里带了勿满。秋深同事一下子火气上来：“有毛病啊？没事找人帮你揿鼻梁干嘛呀！”幸亏本地人意识到了，自家揿了B2，并解释了，而秋深同事也明白搿实在是呒没听懂误会了，才避免了一场险险乎酿出个冲突。而贺梁个新上海人朋友有次乘电梯，遇一本地女青年对伊讲“请帮我六楼揿揿好伐”，伊理解成了“请和我搂搂亲亲好吗”，心想上海小姑娘哪能介开放。直到脱本地同事讲了，才弄清爽哪能桩事体。两人讲个侪正好是坐电梯。勿懂沪语，乘乘电梯就闹出两个误会，其他方方面面误会加起来一定还要多唻。所以，秋深讲，勿讲大道理，为了自家生活个方便，新上海人也一定要努力去听懂沪语，去学讲上海话。

　　不过，一只碗勿响，我迭搭也要讲，造成误会，作为另一方个搿些上海本地人也是有责任个，所以也要吃五十大板。现在人都受过普通话教育，新上海人已占一半个情况下，本地人有时辣公共场合恐怕还是先要用普通话开开道个，当了解了可以用沪语沟通时再讲也勿迟。沪语、本地文化个传承保护是到了刻勿容缓个地步，但该要用普通话交流还得用，沪语个保护也勿推扳搿一眼眼，大家讲对伐？