小囡个绰号

　　文/梁勇

　　配音/丁婷婷

　　我曾写过一首沪语儿歌《阿八头是小毛头》：“隔壁人家屋里头，交交关关小鬼头，阿大阿二阿三头，一直排到阿八头。阿大小头头，阿二烂泥头，阿三洋葱头，阿四长豇豆，阿五五香豆，阿六咸菜头，阿七芋艿头，好白相是阿八头，叼只橡皮奶奶头。”

　　老早子，上海个男小囡侪是有绰号个，用今朝个闲话讲叫呒没绰号个童年是勿完整个。绰号跟昵称、网名最大个区别就是，绰号侪是人家帮侬取个，勿需要经过本人同意，只要大部分人认可，侬愿意勿愿意根本勿重要。前头迭首儿歌里面就包含了老多绰号，所有绰号辣辣我个童年里侪能寻到原形。

　　因为我刚刚养出来个辰光头发稀毛拉里，后首来就有“脚高脚低”个邻居搭我起了“芋艿头”迭只绰号。“芋艿头”只流行于街坊邻居中，学堂里个同学一开始并勿晓得。有趟早浪长跑（当时学堂条件有限，侪是辣辣学堂附近个马路浪跑），路过屋里门口，有个“拎勿清”个邻居看见我，就冲我哇啦哇啦叫“芋艿头”，拨拉同学听见穷笑我，弄得我火气瞎大。从内心来讲，我是非常抵触“芋艿头”个。到中学碰到一个也叫“芋艿头”个男同学，乃末我个绰号辣辣学堂里呒没人叫了，一个班级里哪能可以有两只“芋艿头”呢。

　　对绰号细细研究，侬就会发觉小囡个绰号跟头型，发型，面型，以及体形有老多关系，比如最常见个有长脚，大块头，长豇豆，咸菜头，黑炭，架梁，赤膊鸡，小辫子，阿胡子，大拉疤，小拉疤咾啥。（拉疤是因为脸上有道明显的伤疤而得名）还有蛮多跟屋里排名有关，比如阿大阿二，阿八头。跟名字谐音有关也比较多，有个同学名字里有“凯”，就脱伊起名“铅桶”（沪语中凯和铅同音），有人姓“陆”就叫伊“绿豆汤”（陆与绿同音），最倒霉个要数一个姓田个男同学，中学里学到一篇课文叫《田寡妇看瓜》，后来伊就有了田寡妇搿个绰号，而且经常拨人家简称：寡妇。据说有一年春晚，蔡明辣小品里拨人叫了“菜包子”，乃末全国一记头多了交关只“菜包子”。当年班级里有个老好看个女生名字叫施赛琳，阿拉一般就用数字“430”来替代伊，伊拉爷娘当时起名字是勿是晓得迭个名字几化符合今朝子个数字化时代，真是老有远见。阿拉姆妈姓葛，人家侪叫伊小葛子因为音同小鸽子。不过我要声明，阿拉姆妈从来也勿放人家鸽子个！

　　如果绰号前面加了一个人个所在地，葛末就说明迭个人大有来头，普通人是呒没资格加前缀个，比如上海市X中学某某某，虹镇老街某某某，闸北某某某，浦西某某某，范围越大名气越响，最近全国名气最响个绰号当属搿个“北京海淀银枪小霸王”了。

　　绰号个时代感是显而易见个，侬要是现在拨人家起“大块头”“长脚”搿种早已丧失个体标志性个绰号，绝对是没有人呼应个。脱昵称伴随辣一道，英文名和网名个崛起，绰号慢慢个退出了历史舞台。

本文因配音关系略作改动