当年卖瓜是大事体

　　文/郑自华

　　配音/丁婷婷

　　天气老老热了，水果店里，马路边浪个地摊，侪是西瓜，牌子浪写个侪是上海名牌西瓜“8424”。夜里乘风凉个辰光，居民笃笃定定拣西瓜，随买随吃，交关方便。老早吃西瓜个尴尬日脚已消失得呒没踪影了。

　　上个世纪80年代初期，还是计划经济。对居民来讲，天热要吃一眼西瓜邪气勿容易，其实，搿个辰光卖西瓜更加勿容易。埃个辰光，我辣拉一家食品店当小头头，管百把人。辣拉西瓜上市一个号头【月】前，上级公司就开始布置，要打好西瓜战役。讲西瓜战役，搿搭呒没任何夸大个意思。辣每年西瓜供应季节，果品商店、食品商店就紧急动员起来了。员工个休息全部取消，一半员工负责日常营业，一半员工负责西瓜供应。商店个格局早就做了调整，柜台进行了合并，腾出一半店堂间摆西瓜。西瓜供应是一项政治任务，要保证居民吃到、吃好西瓜。因此，团支部早就做了动员，青年突击小组也成立了起来。一些小青年特别能战斗，吃辣店里，睡辣店里，几个礼拜勿回去。有眼家长勿放心，就偷偷摸摸跑到店外头，看看自家个小囡。

　　伊个辰光个西瓜凭小菜卡供应，5个人算大户，5个人以下算小户。大户供应30斤，小户20斤，小菜卡由营业员当场剪角。送西瓜个车子还呒没到，店门口就有人排起长长个队伍，住辣商店附近个居民老早就摸透商店进货规律。勿过，发寒热38度以上、凭病历卡可以勿要排队，优先照顾购买一只西瓜。稀奇个是，伊个辰光，从来呒没发生过病历卡造假、冒充个现象。搿个辰光西瓜好坏勿稳定，质量勿大灵光个，卖起来就老吃力。农民伯伯辛辛苦苦种出来，又勿好随随便便浪费，总要想想办法，乃末，熟手【业务尖子】就派用场了。熟手就是有水平，拣了一只西瓜，用刀尖挑出一只三角，红颜色个瓜瓤让消费者看得老开心，再让消费者尝一口三角瓜瓤，板定是老甜个，熟手顺便再拣几只，凑满可以规定购买个分量，或者超过规定分量，让消费者多买一只西瓜，并再三关照迭只先吃，迭只后吃。居民碰到迭种营业员，蛮捂抖【开心】。熟手还辣拉西瓜浪做记号，劈如辣拉某个部位削脱一块皮，以防将勿是本店个瓜拿来调。由于西瓜质量勿稳定，吵相骂是经常发生个。卖瓜最麻烦个是熟与不熟，有眼西瓜瓜瓤是红个，但是不甜；有眼有甜度，瓜瓤、瓜子是白个。西瓜个甜度又呒没办法可以测量，西瓜又勿是机器加工个。为西瓜是勿是熟、几分熟而争论勿休，天天要面对几百个顾客讲同样个闲话，营业员真勿好做，营业员勿可以顶撞顾客。店堂间热得像火炉，几只电风扇又呒没办法将大家个火气压下去，为了勿影响做生意，我就出面当老娘舅，将顾客请到边浪，端一杯冷开水，用冷毛巾揩一把面孔，再好好叫讲道理，最后退眼钞票，或者是再送一只小西瓜，算是解决问题。

　　整个西瓜战役有两个多号头。西瓜战役结束以后，每个人辣拉写小结个辰光，侪会出现迭能介个闲话：“虽然嗓子哑了，皮晒黑了，人变瘦了，可是，阿拉个心更红了。”现在看来，迭种说法有点夸张，但是蛮有道理！

本文因配音关系略作改动