江西人补碗自顾自

　　文/周钰栋

　　“江西人补碗自顾自”迭是一句老里八早就辣上海滩浪流行个歇后语，伊个意思是讲一个人只管自家个事体，别人家个事体想也勿去想。伊告普通话里个谚语“只扫自家门前雪，哪顾他人瓦上霜”有异曲同工之妙。葛末迭句歇后语是哪能辣拉上海滩浪向行起来个呢？又为啥道理要专门盯牢仔江西人来讲呢？据说是因为江西景德镇是专门出产瓷器家生个，既然侬江西人会做碗，葛末补碗也肯定是来三。告咾上海人只要一讲到“补碗”，就自然会想到江西人，事实浪辣拉市面浪向做补碗搿个行当个人也大都是江西人。再讲，老里八早普通百姓辣拉用碗盏家生个辰光侪是老当心个，生怕掼坏脱，要是阿里一天勿当心掼坏脱一只，葛末真是肉麻【心疼】得勿得了，赶紧会得拿掼坏脱个碗拾起来拼拼看，拼勿起来了，就只好掼到垃圾桶里去哉，要是还拼得起来，就用一张申报纸裹起来摆好，等到门口头有补碗个来了，就拿出来叫伊补一补再用，所以讲补碗人个生意也常庄有得做个。

　　葛末搿个江西人是哪能拿阿拉掼坏脱个碗补好个呢？侬看，伊坐辣一张小板凳浪，脚馒头浪铺一块布，就辣搿块布个上头拿坏脱个碗一块一块拼好，再用一根头头子浪带有一只铜片钩子个线绳，钩牢碗边后拿整只碗扎紧、固定，然后拿伊夹辣自家两只大腿当中，左手握牢一只大约有五厘米长短个木柄，搿只木柄个下半部装有一根能转动个细轴，轴个头子浪向装有一粒金刚钻，因为瓷器搿样物事邪气坚硬，呒没金刚钻就钻勿动伊，阿拉平常一直讲个“呒没金刚钻，就勿要去揽瓷器活”就出辣搿搭。当搿个补碗人个右手拿一张像拉二胡一样个弓，伊拿弓弦朝金刚钻浪向绕两圈来回一拉，金刚钻就转动起来，辣拉碗浪向钻起眼子来。只见伊辣坏脱个碗缝两边按一定个距离钻上几对眼子后，就根据东家出个价钿选用铜皮，或者是银皮、铁皮做成个搭钉，钉进钻好个眼子里骑缝搭好，再用一只相当小巧个木榔头朝骑缝搭钉浪向敲一敲，让每一只搭钉紧贴辣碗身浪。等到搿个一步做好后，伊就拿扎辣碗身浪个搿根线绳松脱，再拿拌好个瓷粉辣拉碗缝浪向嵌一嵌，最后用一块布里里外外一揩，托起搿只补好个碗，眯起眼睛像欣赏一件艺术品一样，翻过来翻过去个看几遍，确定一眼眼问题也呒没了，就朝东家个门里向一喊：“碗——补好啦。”辣拉整个补碗个过程当中，就听伊讲了迭能介一句，其他辰光伊是一句闲话也勿讲，只顾低了头做生活，侬要是想搭伊讲点啥闲话，伊是定规勿会答侬腔个，大概是为了防止分心，毕竟补碗是一样细巧个生活，马虎勿得。据说，伊迭能介一门心思低了头只管做生活，就是“江西人补碗自顾自”个来历。其实，还有一种比较确切、流传也更广个讲法，就是当补碗个人辣海拉弓用金刚钻朝碗浪向钻眼子个辰光会发出“嗞咕……嗞咕……”个声音，阿拉迭些辣旁边看稀奇个小囡，听到搿种声音一时兴起，就会起哄：“江西人补碗嗞咕……嗞咕。”而搿个“嗞咕”是个拟声词，搭仔上海闲话里向个“自顾自”个读音又来得个接近，辰光一长，交关大人就拿小囡嘴巴里个搿句讲白相个闲话，顺手搬了过来，讲成仔“江西人补碗自顾自”，成了流行辣拉上海闲话里向个一句歇后语。

　　现在，阿拉生活水平提高了，要是屋里向真有碗坏脱个闲话也勿会再去补了，呒没碗补，补碗个行当也就退出了历史舞台，但“江西人补碗自顾自”搿句歇后语还是相当完好个保留了上海闲话里，成为上海人辣拉生活当中表达情感个一句妙语。