西瓜皮捉蚊子

　　文/颜志忠

　　逢着瓜市，一面吃西瓜一面看电视是阿拉屋里每日天夜里个必修课。一只西瓜对剖开，囡儿搭我一人一半，互勿侵犯，家主婆个调羹辣我搭仔囡儿个“地盘”里“打游击”，收作瓜皮瓜籽咾啥倒是我包脱个。一个周末，电视看到夜深，剖成半圆形个西瓜老早刮得来生生青。拿瓜皮掼到垃圾箱，要暗里墨脱穿过一条弄堂。我懒了，想明朝再掼，就随手拿西瓜皮摆辣灶间个墙角落。

　　第二天一早起来，我看到刮得生青个西瓜皮浪向哪能有几个小黑点，伛下腰低头一看，噢哟，适适意意停仔六七只蚊子，一动也勿动。头子活络个，寻着避暑胜地了，阴笃笃，甜滋滋。我用手节头对准顶上头个一只揿过去。“嗡”一记，飞脱两只。“爸爸，罩牢伊。”读二年级个囡儿递过来一块揩布。我接过揩布就朝西瓜皮浪向罩上去。大热天，揩布经过一夜天蒸发，干得轻飘飘。辣揩布还呒没来得及拿西瓜皮罩着实，又有两只蚊子从缝缝里滑脚。动作慢个几只，罩是罩辣里向头，我倒一时上头还想勿出有效个处决手段。正辣犯难，家主婆出了个主意：“用水淹。”我拿瓜皮捧到水龙头下，打开龙头，让水从揩布里洇进去。等水放满，慢慢叫掀开揩布，三只蚊子已经氽辣水面浪。还有眼勿放心，拿手节头捏一记，绝对呒没生路哉。第二天，再用搿种办法诱捕，灵光个，又有六七只蚊子中计入“瓮”。我拿揩布弄弄湿再罩西瓜皮。因为湿布有点分量，一记头闷牢瓜皮，移到水龙头个辰光又勿发飘，搿记战绩辉煌，一网打尽。

　　后来，电视台摄制“家庭巧法灭虫害”节目，阿拉一家门作为发明者搭仔示范者，辣荧屏浪向介绍了拿半只西瓜皮捕杀蚊子个操作过程和灭蚊效果。