做卯时

　　卯时就是十二时辰里向第四个时段，老清早五点钟到七点钟个辰光，辣夏场里【夏天】个搿段辰光，天色已经白亮，勤谨【勤奋、勤劳】个农民老早就辣田里做生活了。老农民跟知青侪晓得，热天汛辣卯时里下田做生活，俗称“做卯时”。

　　辣解放前头，稻作地区个农民有个人家田来得个少，伊拉相信“只要勤俭做，黄金满地撸”个老古闲话，勿怕衰瘏【sadhu累】勿怕忙，做生活一本正经从来勿会得偷私乖【偷懒】，风里来雨里去，练出了一手又灵又巧个好本事，辣农忙个辰光既能够照应好自家田里个事体，还要勿脱时节个帮地主人家做做散工赚眼铜钿，葛末伊拉就想出了一种好办法——吃早饭前头先辣自家田里做卯时，到日头旺去旺来个辰光再到东家拉去吃早饭咾做生活。“做卯时”个起因就是搿能来个。

　　后头来到了上个世纪个六、七十年代，人民公社大生产，要千方百计夺高产，郊区农村开始种“双季稻”，一年两熟水稻一熟麦，生活多是多得来来勿及做啊，葛末就只好抢辰光去做，抢收早稻、抢种、抢管后季稻（还要管棉花田），统称“三抢”大忙季节。于是乎“做卯时”又行起来了。

　　实际浪做卯时是老早老早个，一般早起里四点钟快，忙起来三点钟就做也有。卯时辣乡下头是一个松橡皮筋个讲法，下半夜四点钟前后侪好叫卯时。

　　做卯时是由小队长吹叫子【哨子】叫个。葛辰光真个是一日忙到夜，夜里向水泥场浪开仔“小太阳”轧稻【脱粒】轧到毛半夜，早浪向还垃呼啦呼啦好睏得来邪气，叫子一叫，只好眼睛一弥【揉】，碌起来就开门朝外跑。做卯时个规矩是空肚皮下田，不吃早饭个。葛末只好头浑陶陶跟仔队长到田横头。

　　卯时里个生活我插队辰光好像做过七八趟。葛辰光已经有插秧机了，做卯时主要是拔秧。好几趟侪是天勿亮就拿了拔秧凳赤脚到秧坂田。小队长用一根长竹头为每个人量好长短，每人拔好仔两竹头长个秧再好吃早饭。尽管有得“工”字形个拔秧凳好坐，不过还是要弯腰曲背去用力气。天么还呒没亮，暗绰绰看勿着几化光亮，手电筒也勿好去用，只好坐垃秧坂田里低仔头借仔要亮还勿亮个天色告秧坂田水色个模模糊糊光线，凭两只手个感觉，一蓬又一蓬个连汤带泥拔起秧来。拔秧也有窍门，腰要弯来转，手要抠得快，根要汏来爽，把要扎来齐，人要蹲得住，凳要岔【移动】来忙。就是讲要重心下移，力道朝下；因为秧个根已经发到泥里向，两只手必须要抓垃根根头告烂泥之间去拔，位置太高要断脱，抠得太深带出泥多而且又重又慢，拔个辰光每根手节头骨侪有用场，出手要快顺带划水划脱眼泥；汏秧要汏到根苏煞清，秧底个泥要尽量少，葛末挑秧个辰光担子就勿会加重；秧把子要扎来齐崭【整齐美观】扎紧，葛末就抛得远咾抛勿散。

　　葛辰光几个女知青顶怕做卯时，主要是怕秧坂田里个蚂蝗。墨赤乌黑个早起里，伊拉两只脚伸垃水田里，慌里慌忙只想勿要比人家拔来慢，一歇歇就听得女声尖叫“奥吆妈呀”，一条黄墩墩、软酥酥、扁塌塌个水蚂蝗已经贴牢伊脚盔子【小腿】，正削尖仔尖尖头游法游法朝脚里钻。小队长穿过去用劲拔出蚂蝗，脚浪已经有血眼子了。再摸摸另外只脚浪又叮了两只。小队长划仔自来火点着飞马牌香烟壳子拨蚂蝗吃烧烤消灭了搿虫。叫女生豪燥挤出血来，汏好手用馋唾水搨【涂】垃咬口浪。小队长话断命个蚂蝗是讨厌，能介多也介，一歇一只一歇一只，假使觉着痒么肯定爬上来了，觉着痛么已经吸脱血了，真是恶极不理！不过勿要吓，等日头出来，五诺【我】唱只耘田山歌拨听。

　　勿断叮牢脚盔子个蚂蝗，让做卯时做出了现在勿会有个故事。