粘刨花

　　每趟到超市看到化妆美发商品，总让我想到童年辰光阿拉屋里向人个秀发秘宝——粘刨花。

　　迭个辰光，阿拉祖孙三代九人只有我爷一人上班，日脚过得扣克扣，但从来勿妨家人个爱美之心，尤其阿奶。老人家勿管何时何地，总弄了人舒舒齐齐才会露脸。

　　每日清早，伊侪会一成勿变提仔搪瓷杯，捏把旧牙刷，沾沾杯里个粘水，朝头浪左三下右三下，然后理篦白发，勿下二分钟，头路清晰鬓发有光个老人展容跟前。开始只有阿奶专用，后来阿拉娘告姐姐妹妹也跟仔偷师起来。每到月底弄堂里会有个宁波口音个老爷叔来吆喝：“卖……粘刨花！”阿奶听见后，马上迈开小脚，花五分钱买上一串拾来根木刨花。老爷叔推销讲是奉化老家枯老桃木花。原来桃树木质会分泌很粘个桃胶，刨花浸水里一夜天，就会渗出透明粘液，近似今朝派定型用场个啫喱膏。

　　要是讲今朝还有迭种纯天然个美发粘刨花出售，我肯定会首选伊。