七夕，吃巧果

　　文/黄顺福

　　勿晓得啥辰光开始，中国个乞巧节变成了西方情人节个“克隆”。其实两个节日根本勿是一桩事体，乞巧节辣民间有好多习俗，像设香案、穿针引线、乞巧拜月咾啥，当然，中国人过节免勿了同吃联系了一道，乞巧节个习俗是吃巧果。

　　上世纪70年代，口粮按定量搭配面粉。姆妈勿会擀面条，勿会蒸馒头，呒没辰光做塌饼，只会做“面疙瘩”。小妹勿懂事，总埋怨：“顿顿糊糊达达，吃得人一肚皮个疙瘩。”

　　乞巧搿一天，姆妈倒出平常节省下来个一局局油，花费九牛二虎之力，拿面粉做巧果。天井里香烟缭绕，小圆桌浪盆子里盛仔巧果、莲蓬、白藕、红菱。四种祭品代表姆妈个心愿：夫妻情笃，囡儿手巧，儿子多福，儿孙伶俐。巧果个香味诱得伲口水直淌。姆妈讲，囡儿吃仔乞过巧个巧果，手更巧，会女红，嫁好老公。小妹吊牢姆妈个手臂发嗲。伊拜完仙女三姑娘，香燃完，桌浪巧果就侪算归伊专有。

　　阿爸讲，搿天人间个喜鹊侪到天浪搭鹊桥去，牛郎织女踏仔鹊桥相会。作孽啊，全怪皇母娘娘，伊拉一年只能相会一趟，喜鹊头浪个毛侪让伊拉踏脱。今朝个喜鹊侪是“秃顶”，躲拉葡萄架下还可以听到牛郎织女讲悄悄话。我拉小妹去钻葡萄架，小妹守拉巧果边浪勿肯离开，笑嘻嘻讲，等一歇拨大哥吃巧果。

　　搿一年，拉垃安徽“插队”个大弟回家，姆妈拿巧果全倒进伊个旅行包。小妹熬勿牢脱口而出：“我个……”姆妈一瞪眼，拨伊辣浪一记耳光。第二天，小妹眼泪汪汪醒来，枕头边摆仔大半包巧果，是大弟临走拨小妹留下来个。小妹吃着巧果，觉着手交关巧，兴致勃勃用姆妈个工作手套帮我结仔一双纱袜。伊个冬天，我个脚呒没生冻疮。

　　时过境迁，现在我个小辈只记得过各种“洋节”，中国传统个节日，或者忘了，或者只记得放假、吃：过年吃年饭，端午吃粽子，清明吃青团……至于伊拉承载个传统文化意义早就“抽空”，乞巧节也勿知勿觉间变成情人节。其实，节日产生于形而上个精神需求，人垃拉物质需求满足个同时，更应追求精神满足，假定忘了节日个文化内涵，就像人掉了魂，只剩下躯壳，过节还有啥意思？