我个“三只手”朋友

　　文/余之

　　上海人讲一个人是“三只手”，迭个是勿光彩个。“三只手”是贼骨头、扒手个代名词。但我迭位朋友个“三只手”是光彩个：一只手做生意；一只手搞翻译；一只手写文章。依我看，迭位“三只手”中做生意迭只手长一点；另外两只手差不多长。要是让漫画家徐克仁搭伊画一幅漫画，一定是只“怪兽”。

　　和迭位“三只手”相处，最大个优点是轻松。坐辣咖啡馆里品茶、喝咖啡，“茄山河”，蛮开心。人与人相处，平等、放松至为重要。人个一生要和多少人打交道？如果打交道前，先要将对方放在“天平”上称一称，看看有啥个好利用个，一直辣拉动坏脑筋，勿要吃力煞个，上海闲话讲“要弄煞脱个”。

　　“三只手”大学里学个是日语。当初伊以为学日语最容易，因为有交关中国字，其实，并勿是迭回事。进了学堂就得硬着头皮读下去，他正是读了日文，才有了与日本人做生意个资本，才有了日本个屋里，才有了今朝个日本来来去去……所以，人生有交关偶然性。依我观察，日本呆久了，连样子也像起了日本人，跟日本朋友打起电话来，叽哩呱啦个“木西，木西”，人家还真以为伊是日本人呢。伊秃头，面孔圆，还真有点像“田中角荣”哩；连伊个老婆也有点像日本女人了，见人彬彬有礼，一弯腰，笑嘻嘻，接听电话“嗨、嗨……”个有礼貌。伊辣拉做生意空档搞翻译，最令伊得意个是九十年代中期，伊引进、翻译了电视剧《东京爱情故事》，时隔近二十年了，当年个小青年、今天四十上下个中年人侪被女主人公个爱情故事迷昏了，感动得一把鼻涕一把眼泪。一年前，上海滩重放了搿部电视剧，依然是有勿少痴情男女看得“痴”，当年看过此剧个人还有辣报纸浪写文章，哪能哪能个记得“赤名莉香”之类个闲话，可见迭只剧影响交关深。

　　“三只手”有交关人生故事。“文革”中，伊去云南插队落户。一次，辣原始森林里砍树，一棵大树倒下来，铺天盖地黑压压个一片，一眨眼一大群砍树个人呒没了，一查，压死了好几位兄弟，人家以为伊也“拜拜”了，勿料，他却从大树个爪子底下爬出来，活了命；伊个革“文化命”个时代吃不饱饭是常事，“三只手”当年还是小青年，饭量大，伊看着“泔脚缸”，辣海想：现在爷娘在世还有点饭吃，将来爷娘过世了我“哪能办”，转念又一想，有了，有了迭只“泔脚缸”，我“死勿脱哉”。一只发臭个“泔脚缸”居然拨辣伊活下去个勇气！听了迭段真事体，朋友们个鼻头侪有眼酸溜溜个。

　　“三只手”迭只“生意手”，可能还得益于伊个遗传因子。伊辣“祝家庄”里个长辈很多人辣旧上海做生意。旧上海做生意个人，到了新上海大抵呒没好结果。五十年代个“三反五反”勿讲；六十年代“文革”就是灭顶之灾。所以，“祝家庄”里有交关风风雨雨惊心动魄个故事，一旦伊想写下来侪是邪气精彩、现成个小说和纪实体裁作品，伊也写了一些，大型文学刊物也常有刊登。但伊忙，加懒，写得亦勿多，迭个老可惜个。我常鼓动伊要多写点。

　　伊讲伊经历过个“云南——上海——大阪”，辣地图浪巧成一条直线，像是一条直直个扁担。伊好多次表示要写一本自传，书名就叫：《扁担人生》。传主：祝子平。

　　阿拉真诚个等着伊，也希望伊勿要光“嘴巴”讲不做，到后头，喇叭腔！