元宵花头摸老老

　　文/唐位位

　　元宵节过好，太平了，乃末，一门心思上班去了。

　　想勿到，单位里向交关闹猛。先是，阿王拿来伊拉姆妈裹个团子，请阿拉吃。

　　邪气可爱。一种是比乒乓球大两圈个圆团团，掰开来，一股野香喷出来，是野荠菜妹妹、黑毛猪阿哥豁上后发出来个味道，一边刺激馋唾水分泌，一边刺激荷尔蒙发嗲。啊呜一口咬上去，又发觉糯米粉嫂嫂浆糊淘得好，先是湿面粉糅好洞房，让菜妹肉兄蹲进去，再干面粉炒熟拍一圈，乃朝好，就算侬里向头恩爱得滚过来滚过去，也勿碍了，随便哪能勿会糊脱哉！味道哪能？侬自家去想！

　　另外一种么，喏，爱情个结晶——长悠悠个豆沙团子。长得像只茨菰，头上梳了条小辫子，甜咪咪个伏【bhu】了荠菜黑毛猪团子爷娘边浪，一声勿响，咬一口，又糯又甜。

　　一边吃团子，一边茄山河，讲讲自家屋里向过元宵节个传统。

　　单位辣拉宝山区，宝山区蛮大个，隔几步一个口音，隔几步一个风俗。拨阿拉吃团子个阿王是祁连人，伊闲话勿多，团子说明问题。

　　大场阿宝发表意见了，伊讲：“十五【我，大场发音同十五】个规矩呢，是正月半吃团子，正月十六吃馄饨，十五【我】今朝下仔班，就到丈母娘拉吃馄饨去了。”又讲：“伲团子大来兮忒，人客来仔，看见团子勿大会话伲勿存心待客个……”

　　“对个，伲也迭能个！”刘行阿丁有共鸣了，伊讲，“伲勿叫团子，伲叫‘油头’！”

　　“嗯？‘油头’？倒蛮形象个嘛，‘油头粉面’个‘油头’，嗯，油水足个，啥辰光拨我尝尝味道。”

　　“勿对个，是‘圆团’，阿拉读‘油头’！”哦，倒也蛮贴切，元宵节，团圆节，吃“圆团”，好白相。

　　刘行个隔壁邻舍罗店阿吴插进来了，伊讲：“伲迭浪元宵节是吃‘咸糁饭’个。”

　　“‘咸糁饭’啊？就是菜饭咾？”

　　“勿是个，是拿汤团、馄饨、面条，摆了汤里一道下，再辣汤里摆点青菜。伲叫‘咸糁饭’个……”

　　“哦，搿倒真是大团圆吃法呀！”一众人等赞叹不已。

　　我倒是呒啥好讲个，市区人家侪差勿多，阿拉屋里向除了吃两只速冻汤团，呒没啥新意。倒是辣宝山搿块风水宝地上班，混了同事当中，伊拉献宝，我从伊拉身上挖宝，沾了勿少宝气。

　　接下来是担心，随着城区不断个扩大，各个地方各种丰富个元宵、元宵节风俗、内容，还能有血有肉个保持多长辰光呢？