春联

　　文/贡树铭

　　春节快要到了，勿少人家又要贴上红彤彤个、内容新颖个、含有深意个春联了。回忆老里八早我见到个春联，比较多个是陈旧套语。

　　譬如表达行业有：“太白含笑至，杜康携樽来”（小酒店）；“谷乃国之宝，民以食为天”（粮店）；“虽无熊掌味，亦有菜羹香”（小饭店）；“虽属毫末枝艺，却是顶上功夫”（理发店）。“毫末”、“顶上”是运用“双关”修辞法。

　　又譬如：“江湖河海清波浪，通达逍遥远近”；是载人载货个船浪向贴个春联。上联用“氵”做偏旁，下联用“辶”做偏旁，包含水面航行畅通顺利个意思。牙医师贴个春联：“易牙之味，凿齿著书。”“易牙”、“凿齿”，是牙医师医牙、换牙个工作，可是却搭仔古代两个人名恰巧相同。易牙是春秋年代齐桓公个近臣，伊烧菜个技术交关高超；凿齿（姓习）是晋代襄阳人，是《汉晋春秋》个作者，是著书立说个学者。

　　一些春联有可取之处，甚至饶有奇趣个。